Thursday, May 29, 2008

أضحك كركر ... أوعى تفكر

كان يا مكان .... يا سعد يا أكرام ، ما يحلى الكلام .... إلاّ بذكر النبى عليه الصلاة والسلام (صليتوا على النبى ) ، بلغنى ايها الملك السعيد ذو الرأى الرشيد .... أحم...أحم ... هى قلبت على شهريار ليه كده ( عوده للنص ) .. من يجى حوالى يومين كده ، اخدتنى الوطنيه فى الشغل شويه ، وسهرت لحد الساعه 8 مساءاً ..قال ايه !!! عشان اخلّص شويّة شغل ، فسهرت وخلصت الشغل على خير والحمد لله ... ومن هنا بدأت الحكايه : ... طَن.. طَن ..طا (موسيقه تصويرية عشان الحبكه الدراميه ) .. وخرجت من الشركة كالعادة عشان أركب الأوتوموبيل اللى بيروحنى ..أقصد العربيه يعنى ، لقيت كل الأوتوموبيلات وصلت الا ماى اوتوموبيل اللى أنا بركبها (يا محاسن الصدف ) ، سألت الحبايب قالوا لى : زمنها جايه ... ممكن تيجى بعد شويّه ، أستنى عشان توصل ..! مفيش ! لحد ما عدّت ربع ساعة ، وفجأه !! ظهر اوتوموبيل على مرمى البصر ، قلت الحمد لله الأوتوموبيل نرماندى تو وصل ، ولسه حركب بحسن نيه ، قالوا: أيه هى سايبه ، الكل ينزل عشان ده مش عربيتكم ، اصليك عربيتكم أختفت ، أختفت ، قلت يالهو ا.. خير.. إزااااى ، هو مثلث برامواد ظهر فى الملاحات ولا ايه ، ولا ظاهرة الصحون الطائرة رجعت تانى فنزل صحن على الماشى كده وسرق العربيه اللى حلتنا عشان عندهم أزمة مواصلات هما كمان ،ولا يكنش ابتلعها الفراغ الكونى .. قالوا : يامحترم مش بالظبط كده ، بس العربيه وهى جايه فى السكه أصطدها نسر كبير وعصفورتين صغيارين ، قلت إيه يخواتى ده ..نسر وعصفورتين .. ظاهره جديده ده ولا ايه ، قلت ياواد ياحوده أسأل وأتثقف بدل مايقولوا عليك مدبّ ، قالوا لى : ياأستاذ العربيه وهى جايه كان فيه كمين و وقفها وسحب منها الرخص ، قلت : اه كمين .. مش تقولوا كده ، المهم قلت أركب العربيه لحد ما نشوف أخرتها ايه مع الناس الطيبين دول .. ولسه حركب (يادى النيله ).. أتارى فيه بشر بالهبل هى كمان مروّحه وعايزه تركب ( كملت والحمد لله ) ، بس أنا قلت لاممكن أبداً لازم أركب ومستسلمش للواقع ، وانا راكب كان جامبى رفيق الرحله تامرأفندى ، وقال لى ، شايف يا سيد محمود الناس ده متعرفش فن أدارة الأزمات ، قلت له : ياتامر أفندى بالعكس بص وأتعلم فن أدارة الأزمات .

اللقطه الأولى

ظهر واحد من أصحاب الدمغه الكبيره أوى اصحاب الصوت العالى وخرج بحل عبقرى من وجهة نظره ، قال: شوفوا يارجاله احنا نركب خمسات فى كل صف من الكراسى ونساع بعضينا ، (الله الله ... أيه الحلويات ده كلها.. ونعم الرأى السديد ) المهم الناس كأنها مصدّئت !! وتمت محاولات لأقتحام العربيه ، تؤلش انبوبة بنى أدمين و انفجرت ، فمنهم من وفق للدخول ومنهم من تعسر وصوله للكرسى المقصود ، وأكتفا بالشعبطه على باب السياره ، وطبعا صاحبكم اللى هو انا واقف بطه بلدى مش عارف يعمل حاجه ، وكانت آولى محاولات ادارة الأزمه الناجحه .

اللقطه التانيه

واحد من الناس اللى متشعبطه على السياره تقريباً كان مزنوء حبيتين ، وفجأه وبدون معاد ، رمى الشنطه بتاعته و طلع يجرى و الناس تمسك فيه وتهدى فيه وتقوله : خلاص ياسيدى حنسيبك تحط رجليك الأتنيين بدل رجل واحده وهو مصصم ومبيردش على حد ، وبعدين نكتشف أنه لقى سياره فاضيه فراح عشان يأجرها عشان نركب فيها (والله فيك الخير ياخويا ... مجتش من القريب .. جت منك انت )، وصاحبنا عمال يصفر للعربية ويجرى ورها والسواق كأنه مش شايفه ، ولما وصل بحمد الله للسيارة المنشودة ، أتارى السواق كان مِهدّى عشان بيحود (يامحاسن الصدف) وأول ما السواق عدل نفسه طار بالعربيه وكان نصيب صحبنا الشجاع شوية هباب محترمين يستهلوا قميصك ,

فى النهايه بعد عصف ذهنى جبار للمفكرين المبدعيين اللى معانا اللى بسم الله ما شاء الله لو سبناهم يحلوا مشاكل مصر مش حتاخد معاهم ربع ساعه ويخربوها أقصد يحلوها ، خرجوا علينا بما هو آتى ... الناس كلها تتوزع على علبتين الصلصه .نقصد العربيتين اللى موجودين ، لحد ما نوصل لكرفور ( مكان للتسوق فى أسكندريه على الطريق السريع ) وحتقابلنا هناك سياره نوزع عليها الزياده ، استحملنا بعضينا لحد هناك ،ولما وصلنا رمونا فى الهو وانتظرنا امام كرفورا حوالى عشر دقائق لحد ما خير اللهم أجعله خير قال ايه وصلت سياره بيضه أجره جواها واحد عرفت بعد كده انه المٌخلّص ، ولقيت الناس بتجرى على هناك ، قلت يا واد يا حوده مبدهاش بقى ده حقيقه مش خيال و مش وقته تعمل فيه عم المحترم ، أجرى أنت كمان عشان تلحق مكان ، قوم ايه بقى أخدت ديلى فى سنانى وحمامه على العربيه وبعد معجزه الاهيه حجزت مكان جمب المٌخلّص ( انا مش مصدق نفسى انا لسه عايش ) وانتهت الملحمه ، وكل ده بسبب الوطنيه فى الشغل . الله يخربييييت ..ال.. اليهود

5 comments:

عصفور المدينة said...

هههههههه
عجبني أوي موضوع العصف الذهني ده

:)

نبض الحياة said...

السلام عليكم ورحمة الله وبركاته
شارك معنا في إعادة نبض الحياة للشارع السكندري ... شارك معنا في تكوين فريق للعمل في هذا المشروع ... شارك معنا في رفع العبء عن الأسر محدودة الدخل ... نحن في انتظارك لتضع لوجو المشروع وتشارك معنا
اتحاد الأطباء العرب - لجنة الإغاثة والطوارئ - فرع الإسكندرية

Unknown said...

اية دة
انا فاكرة اني علقت
علي الموضوع
دة
دخلت مش لاقيت التعليق
مممم
يمكن قريت من غير ما اعلق
طيب
انت فينك من زمان
مش باين
لعل المانع خير
يلا
سلام

Unknown said...

بشمهندس عصفور
نورت المدونة وبالنسبة لموضوع العصف الذهنى مصر ماشاء الله مليانة بالعباقرة دول بس يعنى مش وخدين حقهم فى البلدى والحمد الله انهم مش وخدين حقهم احسن كانت خربت

Unknown said...

ماى هوبى
يا مراحب
يارب تكون الأمتحانات خلصت على خير
بس على فكره انا المدونة بتاعتى برقيها على طول تلاقى بس انت نسيت وعلقتى فى مكان تانى
انا على فكره موجود بس ممكن مبعلقش وبقراء بس الموضيع
بسسب ضيق الوقت
سلام